Det er enklare å få til ei god gjæring på eit tørrare fôr, og prøvene syner at innhaldet av mjølkesyre og eddiksyre er lågare i år enn sist år. Variasjonen er òg mindre; dvs at fleire av gardsbruka som tek prøve ligg nær gjennomsnittet enn tidlegare år. Restriktivt gjæra surfôr betyr at smakelegheita er god og at det er meir sukker att. Statistikken syner òg at det er dobbelt så mykje sukker i prøvene i år kontra 2019.
Vekstsesongen 2020 har for dei fleste vore god. Mengda grovfôr er bra på mange gardar på Vestlandet. Årsaka er at vi fekk ein kald periode i mai der veksten stagnerte, men som gjorde at vi fekk utvikla mange buskingskot. Dette gir ei tjukkare eng. I seinare område kom denne kuldeperioden for tidleg slik at desse områda fekk ein sein vår og lågare avlingar på 1. slått. Dersom det er høge temperaturar frå vekststart og fram mot slått, vert det rask utvikling i graset og vi får ei tynnare eng. Vestlandet er mangfaldig; vi har og område som fekk reduserte avlingar på grunn av tørke på 1. slåtten, og vi observerte også skade av stankelbeinlarvar.
Grovfôrprøvene kan nyttast som grunnlag for fôrplanar og for å justere og optimere neste års gjødsling. Ta gjerne ei mineralprøve (kryss av for dette i tillegg til næring) for å kunne vurdere fosfor- og kaliumgjødslinga.
Ta fôrprøver for å få mest mogleg att for pengane som allereie er lagt i fôrdyrking og -hausting. Det kan vere litt risikabelt å sende prøver under postgangen kring juletider, så fyrstkomande måndag/tysdag er nok siste frist i år, men ta gjerne kontakt for å avtale prøver rett over nyåret!
Kva med 2. slåtten?
Om ein vil samanlikne 2. slåtten i år med fjorårets, så vert oppsummeringa om lag slik:
- Tørrstoff: Om lag likt; ca. 28 % tørrstoff
- Energikonsentrasjon (OMD): Viser om lag det same som 1. slåtten; høgare energikonsentrasjon i år!
- Fiber (NDF): Litt høgare fiberinnhald i år, men litt mindre med ufordøyeleg fiber (iNDF)
- Protein: Litt høgare i år, men litt mindre variasjon på denne slåtten
- Gjæring: Litt kraftigare gjæring på 2. slåtten samanlikna med fjorårets 2. slått. Innhaldet av sukker er høgare også på 2. slåtten (om lag det doble her òg), sjølv om gjæringa er kraftigare. Det kan skuldast nokså låge temperaturar samtidig som det er gode tilhøve for fotosyntese.