Heldigvis har me ikkje funne mykje stankelbein i år. Men i enkelte gjenlegg finn me likevel stankelbeinlarver. Teikn på at det er angrep av stankelbein er at områder av gjenlegget er heilt daudt. Det veks verken gras eller ugras. Dersom du i tillegg grev litt i jordoverflata, i kanten av det daude området, vil du finne stankelbeinlarver.
Stankelbeinlarvane vil vere larvar fram til om lag st. hans. Då vil dei gå over i pupper før dei vert flygande stankelbein. Dersom du har angrep av stankelbeinlarvar er det derfor ikkje noko poeng i å så på ny før larvane har gått over i puppestadiet og har slutta med å ete.
Dessverre er det lite me kan gjere med eit slikt angrep. Enkelte gardbrukarar har positive erfaringar med å tilføre 40-50 kg brentkalk etter at det har blitt mørkt (larvane kjem fram når det er mørkt), eller tilførsel av 15-20 kg kalksalpeter som eit mottiltak. Dette har me imidlertid verken forsøksresultat eller andre handfaste bevis på at fungerer. Men me kan heller ikkje finne negative konsekvensar av desse tiltaka.
